आमच्याबद्दल

मी, कैलास नागनाथ घुगे
सरपंच – आदर्श गाव बोरफडी
ता. जि. बीड
20 डिसेंबर 2022 मध्ये गावकऱ्यांनी माझ्यावर विश्वास टाकला आणि बालाघाटाच्या डोंगररांगेतील अतिशय दुर्गम भागात असलेल्या बोरफडी गावाचा इतिहासातील पहिला सर्वात तरुण सरपंच होण्याचा मान मला मिळाला.
खरेतर राजकारणात मी नवखा होतो. परंतु हिमालयाची उंची थिटे करणारे स्वर्गीय लोकनेते गोपीनाथरावजी मुंडे साहेब आणि साहेबांइतकीच ताकद व कणखरपणा असलेल्या ना. पंकजाताई मुंडे, तसेच मा. खा. प्रीतमताई मुंडे यांचे विकासाचे राजकारण डोळ्यांसमोर ठेवून काम करण्याचा निर्धार केला.

बोरफडी गावाचा सरपंच म्हणून मला अवघी दोन वर्षे पूर्ण झाली आहेत. या कालावधीत पहिल्याच दिवसापासून गावाच्या सर्वांगीण विकासाचे ध्येय डोळ्यांसमोर ठेवले आहे.
माझ्या मते विकास म्हणजे केवळ नाल्या, रस्ते किंवा इमारती नाहीत, तर —

• वाड्या-वस्त्यांमध्ये राहणारे शेतकरी
• डोंगर-दर्‍यातील कष्टकरी कुटुंबे
• वंचित-उपेक्षित घटक
• महिला, मुली, बालके व वृद्ध

या काळात ना. पंकजाताई मुंडे कोणत्याही सत्तेत किंवा पदावर नव्हत्या. त्यामुळे निधी मिळवणे अत्यंत कठीण होते. परंतु “लोकल टू ग्लोबल” हे त्यांचे विकासस्वप्न डोळ्यांसमोर ठेवून मी कधीही मागे वळून पाहिले नाही.
👉 अभिमानाने सांगतो, ना. पंकजाताई साहेब व मा. खा. प्रीतमताई यांच्या प्रत्यक्ष-अप्रत्यक्ष सहकार्याने अवघ्या 20–22 महिन्यांत ₹15 कोटी 27 लाख 33 हजार इतका विकासनिधी बोरफडी गावासाठी आणण्यात यश मिळाले.
डिसेंबर 2022 पूर्वी बोरफडी शिवारातील 13 वस्त्यांपैकी एकाही वस्तीला रस्ता किंवा वीज नव्हती. पाऊलवाटेनेच ये-जा करावी लागत होती व आजारी रुग्णांना झोळीतून गावात आणावे लागे.
अवघ्या दोन वर्षांत 13 वस्त्यांपर्यंत वीज व रस्ते, 12 सिमेंट रस्ते, 34 खडीकरण रस्ते, 101 गायगोठे, 24 विहिरी, 185 घरकुले, जलजीवन मिशन, RO पाणी प्रकल्प, बंधारे व भव्य प्राथमिक आरोग्य उपकेंद्र उभारून गावाचा विकासातून कायापालट करण्यात आला आहे.